Farm ni-raid sa Batangas: Mga baril, granada samsam
Batangas, Philippines — Sari-saring mga baril at granada ang nakumpiska ng pulisya sa isinagawang raid sa isang farm na hinihinalang pinagtataguan ng isang miyembro ng gun-for-hire sa bayan ng San Juan sa lalawigang ito noong Sabado ng umaga.
Ayon kay P/Col. Glicerio C Cansilao, provincial director ng Batangas Police, naghain ng search warrant ang pinagsanib na puwersa ng Provincial Intelligence Unit, Drug Enforcement Unit, Provincial Mobile Force Company at Special Weapon and Tactics sa bahay ng suspek na si Jay R Urmenita Bas, 37, sa isang farm sa Sitio Marecacawan, Brgy. Quipot, San Juan, bandang alas-10:20 ng umaga.
Ang search warrant ay inilabas ni Presiding Judge Rosemarie Manalang-Austria, ng Regional Trial Court- Branch 87 sa Rosario, Batangas noong Hulyo 14, 2022.
Bagama’t hindi nadatnan ng mga operatiba si Bas, narekober naman sa bahay nito ang isang Cal. 5.56 rifle Colt, dalawang Cal. 9mm pistol, isang Armscor Cal. 40 pistol, mga magazine at bala ng iba’t ibang kalibre ng baril at mga pampasabog tulad ng rifle grenade na may tracing bullet, MK2 hand grenade fragmentation, M26A2 hand grenade fragmentation, at iba pang kagamitan.
Ayon sa police report, ang suspek ay miyembro ng “Eleazar Rocio Criminal Group” na sangkot umano sa gun-for-hire activity at illegal gambling na nag-o-operate sa 4th District ng Batangas.
- Latest