Welder natagpuang lumulutang sa ilog

BONGABON, Nueva Ecija, Philippines — Isang bangkay ng lalaki ang natagpuang lumulutang sa isang ilog sa Barangay Santor ng bayang ito, kamakalawa ng umaga.

Ayon sa Bongabon Police, nadiskubre ang bangkay ng biktimang si Marvin Peralta, 28, may-asawa, isang welder ng nasabing lugar ng kanyang ka-barangay na si Allan Bano, 39, isang negosyante.

Nabatid sa ulat na bandang alas-7:30 ng umaga ng Biyernes habang patungo umano si Bano sa kanyang piggery ay nakita nito ang bangkay ng biktima na palutang-lutang sa nasabing ilog doon.

Agad naman itong itinawag sa pulisya ni Bano at agad na tinungo ng pulisya at dinala sa pampang.

Lumalabas na may sugat sa may bahaging kanang kilay at kaliwang tenga ang biktima dahil sa dugong nanggaling dito.

Patuloy ang imbestigasyon ng pulisya sa kaso.