Convenience store sa Bulacan hinoldap: Suspek utas!
MANILA, Philippines — Patay ang isa sa dalawang holdaper matapos na kumasa sa mga nagrespondeng operatiba ng pulisya, ilang minuto pagkaraang holdapin ang isang convenience store sa Brgy. San Isidro, Paombong, Bulacan nitong Sabado ng umaga.
Sa report ni P/Col. Charlie Cabradilla, acting police director ng Bulacan, kasalukuyan pang inaalam ang pagkakakilanlan ng napatay na suspect.
Nauna rito, sinabi ni Cabradilla na tumawag si Shrelyn Lagman, crew ng Alfamart sa Brgy. San Isidro ng nasabing bayan hinggil sa panghoholdap sa kanilang convenience store ng dalawang armadong holdaper.
Nang dumating ang mga nagrespondeng pulis ay nakita ng mga ito ang dalawang suspect habang papatakas kaya agad ang mga itong hinabol.
Sa halip na sumuko, kumasa umano ang isa sa mga suspect at akmang papuputukan ang mga awtoridad pero pumalya at bumara ang bala pagkalabit nito kaya pinaputukan siya ng mga pulis.
Bumulagta ang holdaper na nasawi noon din pero nagawang makatakas ang kasamahan nito na sumakay sa motorsiklo.
Narekober sa lugar ang apat na basyo ng bala ng cal 9 MM, isang cal 45 calibre Colt pistol at isang magazine na may anim na bala.
- Latest
