Mister pinasok sa bahay, inutas sa harap ng 2 anak
BALUD, Masbate, Philippines — Bulagta ang 39-anyos na magsasaka matapos pasukin at pagbabarilin ng gunman sa harap mismo ng dalawang menor-de-edad na anak sa loob ng kanilang bahay sa Purok Santol, Brgy. Victory ng bayang ito, kamakalawa ng gabi.
Napuruhan ng punglo sa iba’t ibang bahagi ng katawan at agad namatay ang biktimang si Jonathan Almado Blancaflor, may asawa at residente ng naturang lugar.
Mabilis namang nakatakas makaraan ang pamamaril ang hindi nakilalang suspek.
Sa ulat, dakong alas-9 ng gabi, kasama ang dalawang anak na isang 12 at 13-anyos na batang lalaki habang nanonood ng telebisyon sa loob ng sala ng kanilang bahay nang biglang pumasok sa likurang pintuan ang suspek bitbit ang 12 gauge shotgun.
Sa hindi malamang dahilan ay walang kaabug-abog na binaril sa katawan ang biktima na duguang humandusay. Hindi naman sinaktan ng suspek ang dalawang bata na mabilis na nakatakas makaraan ang pamamaril.
Nakuha ng mga pulis sa crime scene ang basyo ng bala ng 12 gauge shotgun.
- Latest