No. 1 ‘most wanted’ sa ‘rape’ sa Calabarzon, timbog sa Quezon

CAMP VICENTE LIM, Laguna, Philippines — Nalambat na ng awtoridad ang isang rape suspect na tinaguriang “Number 1 Most Wanted Person” ng Calabarzon region sa isinagawang pagsalakay sa pinagtataguan nito sa Candelaria, Quezon.

Kinilala ang most wanted na si Ronel Dimaunahan, 41-anyos at residente sa naturang lugar. Siya ay dinakip sa bisa ng warrant of arrest na inisyu ni Patricia Angeles Cataquiz-Fidel, presiding judge ng Family Court Branch 16, sa Sa­riaya, Quezon na may petsang Hunyo 3, 2022 with No Bail Recommended.

Sa rekord ng korte, naganap ang panggagahasa noong 2009, kung saan ang biktima ay 15-anyos pa lamang na halos kalahati ng edad ng suspek na noon ay 29-anyos.

Hinimok umano ng suspek ang biktimang menor-de-edad na sumama sa kanya sa bahay ng kapatid nitong lalaki sa Candelaria, Quezon at doon ay isinagawa ang dalawang beses na panggagahasa sa nasabi ring taon.

Ayon kay Col. Marlon Santos, hepe ng Criminal Investigation and Detection Group-4A, matapos ang mahigit isang dekadang pagtatago ng suspek ay nailagay na siya sa kulu­ngan at mabibigyan na ng hustisya ang biktima.