Mag-asawang contractor sa Quezon, arestado
Mga baril at bala samsam sa CIDG raid
CATANAUAN, Quezon, Philippines — Naaresto kahapon ng Criminal Investigation and Detection Group (CIDG) ang mag-asawang negosyante dahil sa umano’y illegal possession of firearms at ammunitions.
Kinilala ni CIDG director Maj. Gen. Eliseo Cruz, ang mag-asawang suspek na si Meil Yu Tan, 35 at Jacqueline Tan, 38; kapwa contractors at may-ari ng MJIEL Constructions.
Base sa ulat, isinilbi ang search warrant laban sa dalawa ng mga ahente ng CIDG-Quezon sa pamumuno ni Lt. Col. Ariel Huesca, PNP Regional Mobile Force Battalion at Catanuan Police sa bahay ng mag-asawang Tan sa MJIEL Construction Compound, Sitio NFA, Brgy. Madulao.
Ang search warrant ay inisyu ni Calamba City Regional Trial Court, 4th Judicial Region, Branch 36 Judge Glenda Menoza-Ramos dahil sa kasong paglabag sa Republic Act 10591.
Dakong alas-5:30 kahapon ng umaga nang isagawa ang operasyon at narekober mula sa pag-iingat ng mag-asawa ang M16 Armalite rifle, a cal. 40 pistol, a cal. 9mm pistol, a cal. 45 pistol, a caliber Super 38 pistol, 12 gauge shotgun, magazines ng nasabing mga armas, at 1,110 assorted na bala.
Nabatid mula sa source na ang mag-asawang Tan ay supporters at financiers umano ni Quezon Governor Danilo Suarez na tumatakbo laban kay Quezon Rep. Angelina “Helen” Tan.
Kaagad namang dinala sa provincial office ng CIDG-Quezon sa Lucena City ang mag-asawa para sa kaukulang imbestigasyon.
- Latest
