Motor sinuwag ang puno: Driver dedo, 1 sugatan
SANTIAGO CITY, Isabela, Philippines — Isang binata ang nasawi habang nasa kritikal na kondisyon ang kanyang kasamahan matapos sumalpok ang kanilang sinasakyang motorsiklo sa isang puno ng kahoy sa Brgy. Marabulig 1, Cauayan City ng lalawigang ito, kamakalawa.
Kinilala ng Cauayan City Police ang nasawing biktima na si Bonnie Miguel, 21, habang ang kanyang backrider ay nakilalang si John Emil Magana, 17, residente ng Barangay Malalinta sa bayan ng San Manuel sa nasabing lalawigan.
Sa inisyal na imbestigasyon, unang nakipag-inuman sa dinaluhang okasyon ang dalawang biktima at nang bibili sana sila ng alak at sigarilyo ay aksidenteng sumalpok ang kanilang sinasakyang motorsiklo sa punongkahoy.
Nasawi si Miguel matapos magtamo ng mga sugat sa ulo at iba pang bahagi ng kanyang katawan habang si Magana ay kasalukuyang inoobserbahan sa isang pagamutan matapos isugod ng mga rumespondeng tauhan ng Rescue 922.
- Latest
