‘Tunnel Gang’ umatake: P.7 milyong cash sa ATM nilimas
SANTIAGO CITY, Isabela, Philippines — Tinatayang nasa P714,000 cash sa isang Automated Teller Machine (ATM) ang tinangay ng mga hindi pa natutukoy na mga suspek matapos silang gumawa ng tunnel patungo sa isang bangko sa Barangay Magsaysay, Cordon sa lalawigang ito, ayon sa ulat kamakalawa.
Ayon sa inisyal na imbestigasyon ng Santiago Police, gumawa ng tunnel ang mga suspek mula sa inupahang bahay patungo sa isang drainage canal kung saan sila dumaan hanggang sa tapat ng isang bangko at muling gumawa ng isa pang tunnel patungo naman sa target na ATM.
Nadiskubre na lamang ng naka-duty na security guard ang isang butas nang buksan niya ang bank manager’s office kung saan wasak na ang ATM at nalimas ang laman na pera.
Ayon sa teyorya ng pulisya, maaaring matagal na umanong plinano ng mga suspek ang nasabing pagnanakaw dahil sa malinis ang kanilang trabaho at galaw.
Pinag-aaralan ngayon ng mga awtoridad ang mga kuha ng CCTV Camera sa loob at labas ng bangko kabilang na ang mga kalapit na establisimento para sa posibleng pagkakilanlan sa mga suspek.
- Latest