Pulis sa Region 1 na magso-solicit sa Pasko, kakasuhan
MANILA, Philippines — Binalaan ni Police Regional Office (PRO)-1 director P/Brig. Gen. Emmanuel Peralta na mahaharap sa kasong administratibo ang sinumang pulis na magso-solicit ngayong kapaskuhan sa buong Region 1.
Ang Region 1 ay kinabibilangan ng mga lalawigan ng Pangasinan, Ilocos Sur, Ilocos Norte at La Union.
Sinabi ni Peralta na ipinagbabawal niya sa lahat ng kanyang mga opisyal at tauhan ang anumang solicitation letter at pagtanggap ng regalo partikular na mula sa mga illegal.
Ayon kay Peralta, labas sa polisiya ng PRO1 na mag-solicit ang sinumang mga pulis sa mga pribadong indibiduwal at institusyon partikular na sa mga business establishements para sa raffles at iba pang papremyo para sa pagdiriwang ngayong panahon ng kapaskuhan.
“Police personnel who will be reported will be immediately relieved from their assignment and will face criminal and administrative sanctions in accordance with Presidential Decree No. 46 and NAPOLCOM Memorandum Circular No. 91-010 on the Prohibition against Solicitation Activities of Members of the Philippine National Police,” babala ni Peralta.
Inihayag ni Peralta na mag-iisyu siya ng memorandum upang atasan ang lahat ng mga Provincial Directors at mga hepe ng pulisya na paalalahanan ang kanilang mga tauhan na bawal ang solicitations kabilang na ang mga fund raising activities.
- Latest
