Ex-barangay chairman itinumba
BATANGAS, Philippines —- Patay ang isang dating barangay captain sa Batangas City matapos barilin ng hindi pa kilalang suspek, kamakalawa ng hapon sa Sitio Takad, Brgy. Libjo ng lungsod.
Kinilala ni PSMS Teodorico Magboo, may hawak ng kaso ang biktimang si Benedicto Baes ll, residente at dating chairman ng Barangay Pinamucan Proper, Batangas City.
Ayon sa imbestigasyon, alas-4:30 ng hapon ay nakaupo sa kanyang Toyota Fortuner (PQR-557) ang biktima at nagpapakarga ng gasolina sa Berbets Octane Gasoline Station nang sumulpot ang suspek at agad na siya ay pinagbabaril.
Batay sa mga saksi, tumakas ang suspek sakay ng motorsiklo at sumibat patungo sa hindi pa malamang direksyon kasama ang isa pang kasabwat.
Naisugod pa sa Jesus of Nazareth Hospital ang biktima, pero idineklara na itong dead on arrival.
Inaalam pa ng mga otoridad ang motibo ng pamamaslang at ang mga responsable sa nasabing krimen.
- Latest