MANILA, Philippines — Masusing imbestigasyon ang isinasagawa ngayon ng pulisya matapos ang pagkakadiskubre ng bangkay ng isang babae na tadtad ng saksak sa katawan at laslas sa leeg sa loob ng kanyang SUV kamakalawa sa Barangay Inangayan, Sta. Barbara, Iloilo.
Umaalingasaw at naaganas na ang bangkay Claire Diergos, 36, ng Dagsaan, Buenavista, Guimaras sa loob ng sasakyang nakaparada sa nabanggit na lugar.
Ayon kay Lt. Loen Cachila, team leader ng Regional Crime Laboratory 6, ipinagbigay alam sa kanila ng mga tanod ang natagpuang bangkay sa loob ng SUV na tatlong araw nang nakaparada.
Lumabas sa imbestigasyon na ang nasabing SUV ay pagmamay-ari ni dating San Dionisio, Iloilo Mayor Peter Paul Lopez at binili ni Diergos sa halagang P850,000.
Pinag-aaralan din ng pulisya ang pahayag ng ilang residente na isang lalaki at babae ang nag-iwan ng sasakyan sa lugar.