Lolo na tumatawid, dedo sa trak

GENERAL LUNA, Quezon, Philippines — Nalasog ang katawan at namatay noon din ang isang 64-anyos na lalaki makaraang masagasaan ng trak sa National highway na sakop ng Barangay San Vicente sa bayang ito, ka­makalawa ng hapon.

Kinilala ng pulisya ang biktima na si Braul Cataytay, binata at residente ng nasabing barangay habang nasa kustodya ng pulisya ang driver ng nakasagasa ditong Fuso fighter truck na si Joas Pedrowi, 27 Ng Lucban, Quezon.

Ayon sa pulisya, alas-5:45 ng hapon ay patungo sa Catanauan,Quezon si Pedrowi nang biglang tumawid sa kalye kung kaya’t nabundol ito at nasagasaan.

Nakaladkad pa umano ng trak ng ilang metro ang biktima at dahil sa mga grabeng tinamong pinsala ay agad itong nalagutan ng hininga.