Pader ng bahay bumigay: 4 katao patay
SISON, Pangasinan, Philippines — Patay ang mag-asawa, kanilang anak at pamangkin matapos mabagsakan ng pader ng kanilang bahay na niragasa ng putik sa Sitio Pilawan, Brgy. Sagunto, kamakalawa.
Sa ulat ng Pangasinan police provincial office, kinilala ang mga nasawi na sina Jomar Aquino, 26; Jasmine Stocapio, 22; anak nilang si Mary Jane, 3, kapwa residente ng nasabing barangay at pamangkin na si John Christian Salvatierra, 7, residente ng Barangay Artacho ng nasabing bayan.
Batay sa ulat, alas-6:10 ng gabi ay nasa loob ng kanilang bahay ang mga biktima ng mga sandaling iyon ay malakas ang buhos ng ulan dulot ng bagyong Maring.
Ilang sandali ay rumaragasa ang putik na tumama sa bahay ng mga biktima na kung saan ay bumagsak ang pader at nalibing ng buhay ang mga ito.
Agad namang nagsagawa ang mga pulis, BFP at MDRRMO at rural health unit (RHU) ng retrieval at rescue operation.
Narekober agad ang mga bangkay ng mga biktima.
- Latest
