86-anyos lola kasamang natupok ng bahay
Bacacay, Albay, Philippines — Kalunus-lunos na kamatayan ang sinapit ng isang 86-anyos na lola matapos ma-trap sa nasusunog nilang bahay sa islang lugar ng Brgy. Tanagan ng bayang ito kamakalawa ng madaling araw.
Halos hindi makilala nang matagpuan ng mga rumespondeng kasapi ng Bureau of Fire Protection ang sunog na bangkay ng biktima na si Salvacion Barcellano Baral. Maswerte namang nakalabas sa nasusunog na bahay ang kasama nitong anak na si Jesus Baral, 45-anyos.
Sa ulat, pasado alas-3 ng madaling araw nagulat ang mga residente ng nakitang naglalagablab na ang bahay ng mag-ina. Sa lakas nang hangin ay mabilis na kumalat ang apoy sa buong bahay na yari lamang sa kahoy. Sa bilis nang paglaki ng apoy ay napatalon sa bintana ang anak na si Jesus pero naiwan ang nanay sa loob na hindi na nagawa pang iligtas.
Lumalabas na umuwing lasing si Jesus at nagluto ng noodles pero nakatulog kaya napabayaan ang niluluto dahilan para lumaki ang apoy.
- Latest