71-anyos na ‘wanted’ timbog sa rape

ZAMBALES, Philippines — Isang 71-anyos na lolo na tatlong taon nang nagtatago sa batas dahil sa kasong panggagahasa ang naaresto ng mga tauhan ng San Antonio Municipal Police, sa lalawigang ito kamakalawa.

Kinilala ang suspek na si Edito Mocorro, may asawa at residente ng Purok 4 Barangay Luna ng nabanggit na lugar.

Ayon sa ulat, nakatanggap ng impormasyon ang San Antonio Police mula sa tanggapan ng Provincial Intelligence Unit ng Biliran province kaugnay sa kasong kinasasangkutan ng suspek na nagtatago sa San Antonio, Zambales.

Taong 2018 nang ireklamo ng panggagahasa ng isang alyas “Letty” ang suspek at nang makarating sa kaalaman ng huli, siya ay nagtago na sa batas.

Dinakip ang suspek sa bisa ng warrant of arrest na inisyu ni Constantino F. Esber, executive judge, RTC ng 8th Judicial Region Branch 37, sa Naval, Biliran noong May 2, 2018 para sa kasong rape at pinagpipiyansa ang suspek ng halagang P120,000 para sa kanyang pansamantalang kalayaan.