Motor salpok sa truck: 1 dedo, 3 pa sugatan
TINAMBAC, Camarines Sur, Philippines — Nagkalasug-lasog ang katawan ng isang backrider ng motorsiklo habang tatlong iba pa ang malubhang nasugatan matapos bumangga ang kanilang sinasakyan sa kasalubong na trak sa national highway ng Brgy. San Roque ng bayang ito kamakalawa ng umaga.
Namatay noon din dahil sa matinding mga sugat sa katawan si Albert Cater Rombano, 17-anyos, residente ng Brgy. Salvacion.
Sugatan namang isinugod sa Bicol Medical Center sa Naga City ang 17-anyos driver ng motorsiklo na itinago sa pangalang Angelo at mga angkas na sina Francisco Rombano at Judy Ann Rombano, kapwa residente ng Brgy. Maycatmon, Milaor.
Sa ulat, dakong alas-11:25 ng umaga mabilis na binabagtas ng Skygo motorcycle na minamaneho ni Angelo habang angkas ang mga Rombano nang pagdating sa naturang lugar ay nawalan ng kontrol sa manibela ang una kaya napunta sila sa kabilang linya ng kalsada at bumangga sa kasalubong na Isuzu Canter Mini Dump truck (XAT-264) na minamaneho ni David Ipo Jr., 43, ng Brgy. Fabrica, Calabanga.
Sa lakas ng pagkakabangga, sugatang tumilapon ang lahat ng sakay ng motorsiklo habang dead-on-the spot si Albert.
- Latest