Tabang bridge sa Guiguinto bubuksan na sa Agosto 30
MALOLOS CITY, Bulacan, Philippines — Simula sa Agosto 30 ng taong ito, muli nang madadaanan ng lahat ng uri ng sasakyan ang tulay ng Tabang sa Guiguinto matapos na ito ay isailalim sa rekonstruksyon at nilaparan ang kalsada.
Ito ang tiniyak ni Bulacan 1st District Engineer Henry Alcantara nang makapanayam ng ilang mamamahayag sa kanyang tanggapan sa Brgy. Tikay, Malolos City.
Ayon kay Alcantara, ang masamang panahon na lamang ang makapipigil para matapos nila sa petsang nabanggit ang Tabang Bridge, dahil kailangang maaraw ang panahon kapag binuhusan nang tuluy-tuloy ng semento o “monolithic” ang “slab” na siyang dinadaanan ng mga sasakyan.
Malaking problema aniya kung sa kalagitnaan ng pagsesemento ay biglang umulan, dahil makakompromiso ang tibay ng paggawa nito.
Agosto 15 ang unang petsang naipangako ni Alcantara kay Guiguinto Mayor Ambrosio “Boy” Cruz, Jr. sa pagbubukas ng nasabing tulay subalit hindi naisakatuparan dahil sa hindi magandang panahon sa nakalipas na 2-3 linggo.
Nasa 85 porsyento nang tapos ang Tabang Bridge na may 25 metro ang haba, 18 metrong lapad at magiging 4 na “lanes.” Nagkakahalaga ng mahigit P31-milyon ang rekonstruksyon at pagpapalapad ng Tabang Bridge na sinimulang gawin noong Enero.
- Latest