300 Novo Ecijanos tumanggap ng cash for work mula sa DSWD
GABALDON, Nueva Ecija, Philippines — Aabot sa 300 indibiduwal ang naging benepisyaryo ng cash for work mula sa labing-anim na barangay ng bayang ito makaraang tanggapin nila ang pay-outs mula sa Department of Social Welfare and Development (DSWD) Field Office III at pamahalaang panlalawigan na ginanap sa municipal gymnasium, noong nakaraang linggo.
Ayon kay Gov. Aurelio Umali, doble ang benepisyo ng isasagawang pagtatanim ng gulay sa sariling likod-bahay ng mga benepisyaryo dahil may pang-ulam na ang kanilang pamilya ay makatutulong pa ito laban sa climate change na kinakaharap hindi lang ng bansa kundi ng buong mundo.
Ang nasabing programa ay naglalayong makapagbigay ng sampung araw na pansamantalang trabaho sa mga mamamayang kapos at walang mapagkukuhanan ng kabuhayan na may suweldong P300 kada araw.
Ayon naman kay Vice Governor Anthony Umali, ang programang cash for work program na ito ay sa ilalim ng Risk Resiliency Program on Climate Change Adaptation and Mitigation Disaster Risk Reduction ng DSWD at ng NE Provincial government.
- Latest
