Trader inutas sa harap ng nobya
COTABATO CITY, Philippines — Patay ang isang negosyante matapos barilin ng di kilalang suspek sa mukha sa harap ng kanyang nobya sa Barangay Dapiawan, Datu Saudi Ampatuan, Maguindanao noong Linggo ng hapon.
Kinilala ang biktima na si Wilfredo Rivera, 21-anyos, at residente ng Barangay Bialong, Mlang, North Cotabato.
Sa ulat ng Datu Saudi Ampatuan Police sa pangunguna ni P/Lieutenant Melvin Laguting, pasado alas-4:00 ng hapon habang minamaneho ni Rivera ang kanyang motorsiklo, angkas ang kanyang kasintahan upang magbenta sana ng sari-saring produkto sa nasabing lugar nang abangan at barilin siya sa kaliwang pisngi ng hindi pa nakikilalang mga salarin.
Matapos na makitang bumalagta ang biktima, agad na kinuha ng mga suspek ang motorsiklo nito saka tinangay.
Hindi naman sinaktan ng mga suspek ang nobya ng napaslang na negosyante. Blangko pa ang pulisya sa motibo ng pamamaril at pagpatay sa biktima.
- Latest