Ama, tinangkang lasunin ang 4 na anak bago nagbigti Misis na OFW may karelasyon na iba
SANTIAGO CITY, Isabela, Philippines — Isang padre de pamilya ang nagtangka umanong patayin ang apat na anak sa pamamagitan ng paglason sa kanila bago nagpakamataay ang una sa Barangay Abra ng lungsod na ito, kamakalawa.
Ang nasawing ama ay itinago sa pangalang Mulong, 39, isang magsasaka at residente sa nasabing lugar.
Sa imbestigasyon ng pulisya, gabi nitong Huwebes nang ipunin ng ama ang kanyang apat na anak na may edad 5 hanggang 14 sa loob ng kanilang bahay at pilit na pinaiinom ng juice na hinaluan umano nito ng lason na gamit sa pamatay ng daga.
Lingid sa kaalaman ng ama, nakita siya ng kanyang panganay na anak habang nagtitimpla kung kaya’t hindi nila ito ininom hanggang sa matabig ng ama at matapon sa sahig.
Agad na tumakas ang panganay na anak para humingi ng tulong subalit hindi umano makapasok ang mga rumespondeng opisyal ng barangay matapos kabitan ni Mulong ng live wire ang kanilang pintuan upang walang makapasok.
Kasunod nito, nakita na lamang ang katawan ng ama na nakabitin sa kanilang kisame bago magmadaling araw ng Biyernes.
Napag-alaman ng pulisya na may hindi umano pagkakaunawaan ang nasabing tatay at ang kanyang asawa na overseas Filipino worker (OFW) na sinasabing may iba umanong karelasyon sa ibang bansa.
Nasa maayos namang kalagayan ang apat na mga bata, ayon sa pulisya.
- Latest
