Babaeng ‘most wanted’ sa Region 2, naaresto sa Quezon City
BAYOMBONG, Nueva Vizcaya , Philippines — Matapos ang halos tatlong taong pagtatago, bumagsak sa kamay ng batas ang isang babae na top most wanted sa Cagayan Valley (Region-2) matapos matunton sa kanyang pinagtataguan sa Quezon City, kamakalawa.
Kinilala ni P/Col. Ranser Evasco, provincial police director ang nadakip na akusado na si Gemmalyn Mayo, 34, top 6 most wanted person sa Region 2 at residente ng P. Paterno St., Villa Carmen Vironica Village, Brgy. Santa Lucia, Novaliches, Quezon City.
Si Mayo ang itinuturong pangunahing suspek sa pagpatay sa dating karelasyon na si Eugenio Turingan, ng Cauayan City, Isabela kung saan natagpuan ang duguang bangkay nito sa inupahang booth sa Lower Magat Eco Tourism Park sa Diadi, Nueva Vizcaya noong Enero 2019.
Ayon kay Evasco, pinangunahan mismo ni P/Capt. Roderick Rabago, hepe ng Diadi PNP kabilang na ang mga operatiba ng 1st Nueva Vizcaya Provincial Mobile Force Company, Kayapa Police Station, Regional Intelligence Unit 2 (RIU2), Nueva Vizcaya Provincial Intelligence Unit (NVPIU), Sub-Station 5 QCPD at 142nd SAC 14th SAB PNP SAF ang pagdakip kay Mayo matapos makumpirma ang kanyang lokasyon sa Quezon City.
Ang pagkadakip sa akusado ay batay sa bisa ng warrant of arrest na ipinalabas ni Judge Cicero Jandoc ng Regional Trial Court Branch 28, Second Judicial Region sa Bayombong, Nueva Vizcaya noong November 13, 2019.
Ayon sa report ng pulisya, kasabwat ni Mayo ang kanyang bagong karelasyon na isang security guard na nakatalaga noon sa nasabing park kung saan doon din isinagawa ang krimen.
- Latest
