Ahente ng pekeng sigarilyo, tiklo
SANTIAGO CITY, Isabela , Philippines — Dinakip ng mga otoridad ang isang 33-anyos na lalaki, na nagpapakalat ng mga pekeng sigarilyo, matapos kumagat sa entrapment operation sa Villaluz, Delfin Albano sa lalawigang ito kamakalawa.
Kinilala ng Delfin Albano PNP ang nadakip na suspek na si Jerry Mamauag, isang sales agent at residente ng Barangay Santa, Tumauini.
Sa ulat ni P/Maj. Richard Limbo, hepe ng Delfin Albano PNP, nakatanggap ang kanilang himpilan ng reklamo mula sa isang negosyante matapos ibalik ng ilang mga residente ang sigarilyo na nabili sa kanyang tindahan dahil sa kakaiba umanong lasa.
Dahil dito ay agad na naglatag ng isang entrapment operation ang mga operatiba ng Delfin Albano-PNP na nagresulta sa pagkadakip ng suspek.
Nakuha kay Mamauag ang pitong reams at 20 pakete ng iba’t ibang brand ng sigarilyo na nagkakahalaga ng higit P9,000, mga resibo at P1,608 na cash.
Batay sa pagsisiyasat ng pulisya, bagama’t magkakaiba ang brand ng mga nakuhang sigarilyo ay halata na peke ang mga ito dahil pare-pareho umano ang ginamit na serial number at wala ring maipakitang kaukulang dokumento ang suspek.
Matatandaan na nitong huling linggo ng Hunyo ay nadakip rin ng mga operatiba ng Peñablanca PNP sa lalawigan ng Cagayan ang tatlong iba pang mga ahente na nagpapakalat din ng mga pekeng sigarilyo na kinilalang sina Albert Taguinod, 27; Protacio Eugenio, 56, at Jaime Lugo, 53, pawang mga residente rin ng Tumauini, Isabela.
- Latest