Drug dealer sa Baguio hinatulan ng ‘life’
BAGUIO CITY , Philippines — Hinatulan ng habambuhay na pagkabilanggo ang isang drug dealer na naaresto ng National Bureau of Investigation (NBI)-Cordillera may pitong buwan ang nakalilipas sa lungsod na ito.
Sa inilabas na desisyon ni Judge Lilybeth Sindayen-Libiran ng Regional Trial Court Branch 61, napatunayang guilty ang akusadong si Gregory Wasit Quela, 37- anyos, sa pagbebenta ng illegal drugs at bukod sa life imprisonment ay pinamumulta siya ng P500,000 hanggang P1-milyon.
Sa rekord ng NBI-Cordillera, si Quela ay naaresto noong Nobyembre 27, 2020 dahil sa pagbebenta ng shabu sa isang undercover government informant sa loob ng kanyang sasakyan sa Siapno Road, Baguio City. Nasa 1.97 gramo ng methamphetamine hydrochloride o shabu na nagkakahalaga ng P12,000 ang nakumpiska mula sa kanya.
Na-arraigned si Quela noong Disyembre 15, 2021 at na-charged sa paglabag sa R.A. 9165 o Comprehensive Dangerous Drugs Act of 2002.
Sinabi naman ni NBI-Cordillera regional director Atty. Hector Geologo na ang court ruling ay isang “victory” ng gobyerno sa illegal drugs war nito.
- Latest
