19 Chinese kinasuhan sa pekeng RT-PCR test result at travel permit

BAGUIO CITY, Philippines — Labing-siyam na Chinese national na umano’y nagpakita ng mga pekeng RT-PCR test results ang sinampahan na ng kaso matapos arestuhin ng otoridad nang mag-apply ng driver’s license sa Land Transportation Office sa siyudad ng Ilagan noong Biyernes.

Ang 19 Chinese ay sumailalim sa inquest proceedings dahil sa paglabag sa RA 11332 o Health Events of Public Health Concern Act at Article 175 ng Revised Penal Code o Using false certificates.

Nauna rito, nakatanggap ng impormasyon ang Ilagan City Police kaugnay sa pagdagsa ng mga dayuhan sa lungsod kaya’t agaran ang pagresponde kasama ang mga kawani ng City Mayor’s Office, City Transportation and Management Group (CTMG) at Bureau of Immigration sa LTO-Ilagan.

 Nang magsagawa ng beripikasyon, napag-alaman na peke ang mga dokumento ng mga Chinese national kabilang na ang kanilang medical certificate at travel permit. 

 Ayon kay Cagayan Valley Police Office regional director Brig. Gen. Crizaldo Nieves, napag-alaman na ang nasabat na 19 Chinese ay pawang mga taga-Metro Manila.

Nadakip din ang pitong Pilipino na kasama ng mga dayuhan na mula naman sa Cavite, Quezon City, Pasay City at Bulacan.