Barangay chairman nilikida

COTABATO CITY, Philippines — Patay agad ang isang punong barangay sa lungsod na ito matapos pagbabarilin ng ‘di pa nakilalang gunman sa Block 7, Notre Dame Village, Barangay RH-8, ng siyudad na ito ka­makalawa.

Kinilala ang nasawi na si Danny Darping, nasa hustong gulang, punong barangay ng Kalanganan 1, Cotabato City at residente ng nabanggit na lugar.

Sa ulat mula sa Cotabato City Police, abala ang biktima sa paglilinis ng kanyang sasakyan sa ‘di kalayuan sa labas ng kanilang tinutuluyang bahay sa Block 7, Notre Dame Village, Barangay RH-8 nang dumating ang mga suspek, pasado alas-7:00 ng umaga at agad siyang pinagbabaril.

Mabilis na tumakas ang mga salarin matapos ang pamamaril.

Sinisiyasat pa ng pulisya ang motibo ng pagpatay sa tserman.