4 BIFF utas sa Datu Paglas encounter
MANILA, Philippines — Apat na mga kasapi ng Bangsamoro Islamic Freedom Fighters (BIFF) ang bumulagta nang kanilang makaengkuwentro ang tropa ng militar sa Datu Paglas, Maguindanao, kahapon ng umaga.
Ayon kay General Roy Galido, commander ng 601st Infantry Brigade na ang mga nasawing BIFF ay nasa ilalim umano ng Karialan faction na nakasagupa ng mga kawal ng pamahalaan at nagtangkang tumakas.
Narekober ng operating troops ng Joint Task Force Central ang apat na bangkay ng ekstremistang grupo kabilang ang isang mataas na uri ng armas at ilang mga war materials.
Ang nasabing grupo ang tinutugis ng mga militar na sumalakay sa pamilihang bayan ng Datu Paglas nitong Sabado ng umaga hanggang sa apat sa kanila ang mapatay at dalawa ang arestado.
Nangyari ang sagupaan isang araw matapos na bumisita si Pangulong Rodrigo Duterte sa Headquarters ng 6th Infantry Division sa Awang, Datu Odin Sinsuat, Maguindanao kung saan nakipagpulong ang Pangulo sa mga opisyal ng BARMM at humingi ng suporta na tulungan siya sa problema sa paghahasik ng BIFF.
Pinuri naman ni Major General Juvymax Uy, commander ng Joint Task Force Central at 6th Infantry Division, ang tropa ng militar sa pagkakapatay sa apat na bandido at sa patuloy pa nilang pagtugis sa mga tumatakas na BIFF at Dawlah Islamiya.
- Latest
