Higit 76K doses ng AstraZeneca vaccine tinanggap ng Bulacan
MALOLOS CITY, Bulacan, Philippines — Sa layong makamit ang 70% herd immunity at maproteksyunan ang mga Bulakenyo, tumanggap ang Pamahalaang Panlalawigan ng Bulacan ng karagdagang 76,801 doses ng AstraZeneca vaccine mula sa pamahalaang nasyunal kamakalawa at inilagay sa nakatalagang cold storage room sa Hiyas ng Bulacan Convention Center.
Ayon sa Provincial Health Office-Public Health, may kabuuang 46,504 (54.05%) na indibiduwal batay sa alokasyon ng bakuna para sa priority population mula sa pangkat A1 hanggang A3 kasama ang mga frontline health worker at mga propesyunal; mga senior citizens na may edad 60 pataas; at mga indibiduwal na may comorbidities ang nakatanggap na ng unang dose ng bakuna habang 5,751 (6.93%) naman dito ang nabakunahan na para sa ikalawang dose nitong Mayo 10, 2021.
Ang karagdagang 76,801 na mga bakuna ay gagamitin sa mga natitira pang grupo mula sa priority population.
Sinabi ni Gobernador Daniel Fernando na kahit paunti-unti, pagsusumikapan ng Pamahalaang Panlalawigan na makapagbakuna ng mga Bulakenyo hangga’t maaari at hangga’t may available na mga bakuna.
“Dahil sa limitado pa rin ang mga bakuna na available dito sa atin, pagsusumikapan ng ating Pamahalaang Panlalawigan na matugunan at mabakunahan ang mga Bulakenyo hangga’t maaari, hangga’t may dumarating sa ating mga bakuna.
Kahit paunti-unti, alam ko na makakamit natin ang proteksyong ating kinakailangan para labanan ang COVID-19,” anang gobernador.
- Latest
