Rider nagulungan ng trak, patay

GUINOBATAN, Albay , Philippines — Kamatayan ang sinapit ng isang rider matapos na magulungan ng trak nang magtangkang mag-overtake habang bumabagtas sa kahabaan ng national road sa Brgy. Ilawod ng bayang ito kamakalawa ng hapon.

Sinubukan pang dalhin ng mga kasapi ng MDRRMO-Guinobatan sa Josefina Belmonte Memorial District Hospital pero idineklarang dead-on-arrival ang biktimang si Mark Robert Reyes Paycana, 37-anyos, residente ng Purok-2, Brgy. Masarawag.

Tinutugis na ang hindi nakilala at tumakas na driver ng nakasagasang trak.

Sa ulat, dakong alas-3 ng hapon magkasunod na binabagtas ang highway patungo sa direksyon ng Ligao City ng walang plakang motorsiklo ng biktima at Isuzu Giga Truck (CBJ-1377) na minamaneho ng hindi naman nakilalang driver.

Gayunman, pagdating sa naturang lugar ay sinubukan ng rider na mag-overtake sa kanang bahagi ng trak pero naipit at sumemplang ito dahilan para pumailalim at nasagasaan ang katawan sa hulihang gulong ng trak na agaran nitong ikinamatay.