2 nalibing nang buhay sa treasure hunting
PARACALE, Camarines Norte, Philippines — Dalawang construction worker na nangangarap yumaman ang nalibing nang buhay sa tunnel na kanilang hinuhukay dahil sa treasure hunting matapos gumuho at matabunan sa Purok-1, Brgy. Casalugan sa bayang ito.
Walang malay na isinugod sa Paracale Rural Health Unit pero kapwa idineklarang dead-on-arrival ang mga biktimang kinilalang si Dante Bombita Cereno, 33 at Danilo Jerez Castilar, 40, pawang residente ng naturang barangay.
Sa ulat, dakong alas-5 kamakalawa ng hapon sa paniniwalang may nakatagong kayamanan ay lumusong sina Cereno at Castilar sa tunnel na may lalim na limang metro at naghukay.
Gayunman, habang naghuhukay ay biglang gumuho ang tunnel at nagkaroon ng landslide dahilan para ma-trap ang dalawa.
Mabilis na rumesponde ang MDRRMO-Paracale at mga opisyal ng barangay at may ilang oras ding naghukay sa kinaroroonan ng mga biktima bago naiahon ang dalawa na agad isinugod sa pagamutan pero parehong hindi na umabot nang buhay.
- Latest
