633 katao sa Polangui, Albay na-quarantine
Na-expose sa PSA enumerator
MANILA, Philippines — Umaabot sa 633 katao sa bayan ng Polangui, Albay ang isinailalim sa home quarantine matapos ma-expose sa isang enumerator ng Philippine Statistics Authority (PSA) na nagpositibo sa COVID-19.
Ito ang inihayag ni 2nd District Albay Rep. Joey Salceda na personal na ipinamo-monitor ang status ng 633 nitong kababayan sa Polangui kaugnay ng posibilidad na may nahawa rin sila sa virus.
Sa kanyang liham kay Claire Dennis Mapa, National Statistician ng PSA, umapela si Salceda na pansamantalang ipatigil ang door-to-door at face-to-face na pangapangalap ng data sa mga residente sa kanilang bayan para sa national ID system.
“Some 633 individuals are currently undergoing home quarantine in Polangui, Albay because of an enumerator who tested positive for COVID-19. If infection is confirmed, the enumerator would have been a super spreader,” pahayag ni Salceda.
Binigyang diin ni Salceda na suportado niya ang national ID system at hangad na matapos ito sa lalong madaling panahon para mapabilis ang distribusyon sa mga kinakailangang social program ng pamahalaan pero dapat mangalap ng data sa paraang hindi manganganib ang buhay ng mamamayan bunga ng pagkahawa sa virus.
- Latest
