T’boli mayor na unang nagpabakuna, nagpaliwanag
Kasunod ng ‘show cause order’ ng DILG
NORTH COTABATO, Philippines — Binasag na ni T’Boli Mayor Dibu Tuan sa South Cotabato ang kontrobersiya hinggil sa pagbabakuna nito sa COVID-19 vaccine sa kabila na mga medical frontliners ang prayoridad sa listahan ng mga dapat mabigyan ng bakuna.
Sa isang panayam kay Mayor Tuan, nilinaw nitong naglunsad sila ng “inoculation program” noong Marso 19, 2021 kung saan binakunahan ang mga medical workers sa kanilang bayan. Gayunman, hindi umano nagpakita ang apat sa 10 healthcare workers, kaya anim lamang ang nabakunahan.
Dahil dito, nagpulong sila at napagkasunduan umano kung puwedeng maging kapalit ang alkalde sa mga hindi lumutang na dapat mabakunahan, na sinang-ayunan naman ng mga opisyal sa pulong.
Iginiit ni Tuan na masasayang umano ang apat na natitirang doses kapag hindi ito gagamitin. Aniya, ang kanyang pagpaturok ng bakuna ay upang ipakita sa kanilang mga mamamayan na ligtas ito at mapawi ang kanilang pangamba hinggil sa maling impormasyon sa vaccine.
Ginawa ng alkalde ang pahayag matapos maglabas ng show cause order kamakailan ang Department of Interior and Local Government (DILG) laban sa kanya at iba pang mayor kabilang na sina Sto.Niño, South Cotabato Mayor Sulpicio Villalobos, Tacloban Mayor Alfred Romualdez, at Legazpi City Mayor Noel Rosal.
- Latest
