99-anyos lolo todas sa sunog

IRIGA CITY, Camarines Sur, Philippines — Patay ang isang 99-anyos na lolo nang hindi makalabas sa nasusunog niyang kuwarto sa Zone-3, Brgy. Santiago ng lungsod na ito kamakalawa.

Kinilala ang nasawing si Pedro Agravante Velasco, residente ng nasabing lugar.

Sa ulat, ala-1:50 ng madaling araw nagising at nagulat ang caretaker ng bahay na si Vilma Manaog Isaac nang nakitang nag-aapoy na ang kuwarto ng matanda.

Mabilis itong kumuha ng balde ng tubig at sinabuyan ang apoy at tumambad na wala nang buhay ang biktima na sunog ang ilang bahagi ng katawan.

Ayon kay Isaac hindi pa malaman kung papano nasunog ang kuwarto ng biktima pero naikuwento nito sa mga nag-iimbestiga na noong Enero ay nagtangkang magpakamatay ang matanda sa pamamagitan ng pagbigti pero napigilan ito.