Tserman, 4 pa tiklo sa illegal quarrying
MANILA, Philippines — Dinakip ng mga tauhan ng National Bureau of Investigation (NBI) ang isang barangay chairman at apat pang lalaki na ilegal umanong naghahakot ng mga bato at mineral sa Balanac River sa lalawigan ng Laguna.
Kinilala ni NBI Officer-in-Charge (OIC) Director Eric Distor ang mga suspek na sina Brgy. Balanac Chairman Dennis Olipano, Michael Abad, Randy Delos Reyes, Danilo Noriel at Abner Davac.
Ayon sa NBI, may nakarating na sumbong sa kanila ukol sa illegal quarrying sa Brgy. Balanac, Magdalena kaya agad na tiniktikan ng mga tauhan ng NBI-Environmental Crime Division (EnCD) ang lugar at nakumpirma ang ilegal na operasyon nang si Balanac Brgy. Chairman Olipano pa mismo ang nakipagtransaksyon para magbenta ng apat na trak ng bato at mineral sa halagang P17,000 kada trak.
Marso 11 nang magkasa ang NBI-EnCD kasama ang mga tauhan ng DENR-Environmental Protection and Enforcement Task Force (EPETF), DENR-Mines and Geosciences Bureau (MGB) at Philippine Army 1st Infantry Battalion.
Dakong alas-2 ng hapon nang arestuhin ang chairman at apat na kasama nang maabutan ng NBI agents na naghahakot sila ng bato at mineral sa ilog nang walang maipakitang permit.
Nakumpiska sa operasyon ang apat na trak at 30 cubic meters ng mga bato at “fabricated screens” na may halagang P43,000.
- Latest