Van swak sa 180 metrong bangin: Mag-asawa patay, 2 grabe
TUGUEGARAO CITY, Cagayan , Philippines — Nasawi ang mag-asawa habang dalawa pa ang malubha matapos mahulog sa 180 metrong bangin ang sinasakyan nilang van sa Brgy. Balinsiago Sur, Pasil, Kalinga noong Biyernes.
Kinilala ng pulisya ang mga nasawi na sina Daniel at Marilou Minong habang ang kanilang drayber na si Edgar Baddongon at utol niyang si Jerrymar ay nasugatan at nilalapatan ng lunas sa Kalinga District Hospital.
Dalawa pa sa mga pasahero na sina Ariel Lapitan at Johnreich Dawaton ay nakaligtas matapos makatalon palabas ng sasakyan bago nahulog.
Ayon sa report, nawalan ng kontrol ang drayber sa manibela nang mawalan ng preno ang sasakyan saka dumiretso sa bangin dakong alas-4:00 ng hapon. Patungo na sana ang mga biktima sa bayan ng Lubuagan nang maganap ang trahedya.
Naging pahirapan naman sa mga tumugon na emergency responders ang paghango sa mga biktima dahil sa tarik ng bangin at bunsod ng kadiliman ng gabi sa lugar.
- Latest
