Umbagerong mister kinatay ng 83-anyos biyenan
NORTH COTABATO, Philippines — Patay ang isang malupit na manugang matapos pagsasaksakin ng kanyang biyenan nang makitang iniiumbag nito ang kanyang misis sa Purok 4, Barangay Malegdeg, Senator Ninoy Aquino, Sultan Kudarat, iniulat kahapon.
Kinilala ang biktima na si William Acosta, 39-anyos, construction worker habang ang matandang suspek na nahaharap sa kasong pagpatay ay si Diosdado Rana,83, magsasaka; pawang residente ng nasabing lugar.
Sa imbestigasyon ni P/Master Sgt. Eric Vasques, lasing umano si Acosta nang dumating sa kanilang bahay at nag-away umano sila ng kanyang asawa na si Helen, 38. Sinuntok umano ni Acosta ang kanyang misis na nakita naman ito ng biyenan kaya biglang nagalit at agad kumuha ng bolo saka sinaksak ang manugang sa kanang bahagi ng baywang.
Agad na dinala ang biktima sa Senator Ninoy Aquino Municipal Hospital para sa medikal na atensiyon pero idineklarang dead-on-arrival ng sumuring doktor.
Boluntaryo namang sumuko ang lolo sa mga elemento ng Senator Ninoy Aquino Police.
- Latest