COVID-19 UK variant pasok na sa Baguio City
BAGUIO CITY, Philippines — Kinumpirma kahapon ni Baguio City Mayor Benjamin Magalong ang unang kaso ng B.1.1.7 o UK variant ng COVID-19 sa siyudad.
Nabatid na isang 30-anyos na babae na nagpositibo sa COVID-19 noong Pebrero 12 at naka-recover na noong Pebrero 23 ang napag-alamang may taglay na UK variant.
Dahil dito, sinabi ni Magalong na abala na ang mga awtoridad sa pagsasagawa ng contact tracing upang mapigilan ang paglobo pa ng kaso ng COVID-19 variant sa Baguio City.
Magugunita na tinukoy ng Department of Health (DOH) ang unang 17 na COVID-19 UK variant cases noong Enero kung saan 12 dito ay mula sa Bontoc, Mountain Province at isa sa La Trinidad, Benguet.
Namatay naman noong Enero 24 ang unang kaso ng UK variant sa La Trinidad samantalang lahat ng unang 12 UK variant sa Bontoc ay naka-recover na.
Noong Pebrero, isa pang kaso ng UK variant ang napag-alaman sa La Trinidad, Benguet, na nagpalala naman ng takot sa Baguio City sa maaaring pagkakaroon na ng variant na ito sa siyudad.
Ayon pa sa huling datos ng City Health Office nitong Pebrero, nakapagtala ang Baguio City ng 5,665 kaso ng COVID-19, 260 dito ang kasalukuyang active at 5,300 recoveries. May 105 nang patay sa siyudad dahil sa COVID-19.
Kasama pa rin ang Baguio City sa mga lugar na nananatiling nasa General Community Quarantine (GCQ) status.
- Latest
