2 holdaper ng 2 kahon ng sigarilyo, arestado
TALAVERA, Nueva Ecija , Philippines — Arestado ang dalawa sa limang lalaki na nangholdap at tumangay ng 2 kahon ng sigarilyo sa dumaraang motorista sa Barangay Gulod, kamakalawa ng gabi.
Kinilala ni P/Lt. Col. Heryl Bruno, hepe ng Talavera Police, ang nahuling suspek na sina Joshua Navales,22, ng Barangay Pulong San Miguel, dito, at Miguel dela Cruz, 18, ng Barangay Pag-Asa at kapwa construction worker.
Pinaghahanap ng pulisya ang tatlo pa nilang kasama na may alyas “Berto”, alyas “JR” at alyas “Pandong”, pawang mga obrero ng Barangay Pag-Asa.
Sa salaysay ng biktima na si Monico Vicencio, 24, vendor ng Barangay Pag-Asa, alas-7:30 ng gabi ay sakay siya ng kanyang tricycle at may dalang dalawang kahon ng sigarilyo na nagkakahalaga ng P30,000 pauwi na nang siya ay harangin ng mga suspek na sakay ng tatlong motorsiklo.
Tinutukan ang biktima ng baril kaya’t ibinigay ang dalawang kahon ng motorsiklo at umalis na ang mga suspek.
Agad na nagsumbong ang biktima sa pulisya na nagsagawa ng follow-up operation ang naaresto dalawang suspek,alas-9:45 ng gabi.
- Latest