Kagawad, 3 pa huli sa buy-bust

LEGAZPI CITY, Albay, Philippines — Kalaboso ang isang kagawad kasama ang tatlong iba pa matapos na maaktuhang nagpa-pot session sa lungga ng da­lawang “tulak” na target sa buy-bust operation sa Purok-1, Brgy. 57 Dapdap ng lungsod na ito kamakalawa ng hapon.

Kinilala ang mga suspek na sina Kagawad Alex Antuerpia Aguallo, 55-anyos; Bien­vinido Escoto Dawal Jr., 53; Jojo Araceli Ala, 42, at Allan Paul Delos Santos Serrano, 38; pa­wang residente ng nasabing barangay habang tinutugis ang target sa drug bust na sina Dennis Valencia Bahoy, 44, at pinsang si Resty Napod Bahoy, 39.

Sa ulat, dakong alas-3:30 ng hapon sa tulong ng mga kasapi ng Provincial Intelligence Unit, Albay Provincial Mobile Force Company at Regional Drug Enforcement Unit-5 ay inilatag ng Legazpi City Police ang buy-bust operation laban sa magpinsang Bahoy. Gayunman, nang magkabilihan ng droga at akmang aares­tuhin ang dalawa ay mabilis­ na tumakbo at tumakas.

Inabutan naman ng raiding team sa lugar ang apat na suspek sa aktong bumabatak ng droga na kalaunan ay napag-alamang kagawad ng barangay ang isa sa kanila. Nakuha sa lugar ang limang sachet ng shabu, drug paraphernalia at ang naiwang boodle money na ginamit sa buy-bust.