76-anyos lola sinuwag ng motor, patay
TUGUEGARAO CITY, Cagayan, Philippines — Nasawi ang isang 76-anyos na lolang nakatayo sa gilid ng kalsada matapos tumbukin ng rumaragasang motorsiklo sa Brgy. Gana, Caba, La Union noong Linggo.
Ayon sa report, kasama ng biktimang si Susana Sersenia ang mga kabarong senior citizen pauwi mula sa kanilang kapilya nang salpukin ng rider na si Henry Sarmiento, 23, taga-Agoo dakong alas-5:30 ng hapon.
Sa lakas ng salpok, tumilapon sa ere ang matanda at sabay silang nagpagulong-gulong sa kalsada ni Sarmiento.
Kapwa isinugod ng mga sumaklolo ang dalawa sa hospital subalit idineklarang patay na ang lola.
Sinasabing nagpositibo sa pagsusuri sa alcohol si Sarmiento at isinailalim sa kustodya ng awtoridad matapos ang insidente.
- Latest