Motor salpok sa arko: Rider dedo, 1 sugatan

CASIGURAN, Sorsogon, Philippines — Nagkalasug-lasog ang katawan ng isang 23-anyos na rider habang sugatan ang kanyang angkas matapos na bumangga ang minamanehong motorsiklo sa sementadong boundary arch sa kahabaan ng Maharlika National Highway sa Brgy. Boton ng bayang ito kamakalawa ng gabi.

Dead-on-the spot dahil sa tinamong mga sugat ng ulo at katawan ang biktimang si Nikko Estoperes, binata ng Brgy. Panganiban, Gubat habang pa­tuloy na inoobserbahan sa Sorsogon Provincial Hospital ang sugatang ­angkas na si Ma. Krisel Caña Borlagdatan, 22, ng Brgy. Cumon, Malinao, Albay.

Sa ulat, dakong alas-9:40 ng gabi, mabilis na binabagtas ng Rusi motorcycle ni Estoperes kasama ang nasabing babae ang kahabaan ng highway mula sa Sorsogon City patungong Casiguran nang mawalan ng kontrol sa manibela ang una at sumalpok sila sa arko ng municipal boundary ng bayan.

Sa lakas ng pagkakabangga, patay agad ang binata habang mabilis na isinugod sa pagamutan ng rumespondeng rescue team ang angkas.