3 dayong ‘kawatan’ ng LBC, timbog
STA. ROSA, Nueva Ecija, Philippines — Arestado ang tatlo sa apat na lalaking dayo na nagtangkang manloob sa isang sangay ng LBC makaraang mahuli sila sa akto ng pulisya na sinisira ang entrada ng nasabing establisimyento sa Brgy. Cojuangco, dito, kamakalawa ng umaga.
Kinilala ni P/Lt. Col. Fortune Diane Bernardo, hepe ng pulisya rito, ang tatlong nadakmang suspek na sina Bernardino Tan, 47, may-asawa, driver; Ian Sebastian, 30, may-asawa, construction worker, kapwa ng Novaliches, Quezon City at Garry Pioquintio, 41, binata, dance instructor ng Bagong Silang, Caloocan City.
Ang suspek pang si Warren Fernandez, 21, may-asawa ng Novaliches, Quezon City ay nakatakas at pinaghahanap na ng awtoridad.
Ayon sa ulat, alas-5:35 ng umaga isang tawag sa hotline number ang natanggap ng pulisya ng Sta. Rosa hinggil sa insidente ng nakawan mula sa isang concerned citizen na napadaan habang nagdya-jogging sa nasabing branch ng LBC at nakapansin sa apat na lalaking tila nilooban ang nasabing puwesto.
Agad na rumesponde ang pulisya sa lugar at nang makita ng suspek na si Fernandez ang paparating na pulis ay mabilis na sumibad sakay ng isang motorsiklo. Naabutan naman ng mga pulis ang tatlo pang suspek habang binabasag na ang salamin na secondary wall ng LBC branch sanhi ng kanilang pagkakaaresto.
- Latest