Para iwas COVID-19, ‘wag tataya sa jueteng, STL – Gob. Mamba
SANTIAGO CITY, Isabela, Philippines — “Pakiusap. No to jueteng (STL/Peryahan ng Bayan).”
Ito ang mga kataga ni Cagayan Governor Manuel Mamba na mababasa sa mga naglalakihang tarpaulin bilang isa sa mga hakbang para makaiwas sa pagkalat ng COVID-19 sa kanilang lalawigan.
Ayon kay Mamba, bukod sa ilegal ang operasyon ng mga nasabing sugal, malaki ang posibilidad na carrier sa nakamamatay na virus ang mga bet collectors o mga kabo at kubrador na nagkalat sa buong lalawigan.
Aniya, umiwas sa pagtaya sa mga nasabing sugal lalo na at karamihan sa mga kubrador ay hindi sumusunod sa mga health protocols tulad ng pagsusuot ng face mask at face shield sa kabila ng pakikisalamuha nila sa iba’t ibang tao araw-araw.
“Huwag po tumaya sa Jueteng, STL, Peryahan ng Bayan dahil ilegal po ito. Huwag na huwag tumawag dahil ang mga kubrador o collector ng jueteng ay puwedeng sila ang magdadala ng COVID sa inyo o sa bahay niyo,” babala pa ni Mamba.
Ang mga tarpaulin ay makikita sa ibat-ibang mga kilalang gusali sa lalawigan, mga pasyalan o mga pampublikong lugar, ospital kabilang na ang mga pasilidad ng pamahalaang panlalawigan.
Nauna rito, ipinagbawal din ni Isabela Gov. Rodito Alabano III ang pagpapataya ng Small Town Lottery (STL) at anumang uri ng bet collection habang sumasailalim sa Modified General Community Quarantine (MGCQ) ang kanilang probinsya upang maiwasan ang pagkalat ng virus.
- Latest