COVID-19 vaccine simulation, sinimulan sa Carmona
CAVITE, Philippines — Sa kauna-unahang programa, isinagawa sa bayan ng Carmona, dito sa lalawigan ang simulation ng COVID-19 vaccine.
Ang lokal na pamahalaan ng Carmona ang kauna-unahang bayan sa Cavite na nagsagawa ng “simulation vaccine rollout” para sa COVID-19 na idinaos sa Carmona Community Center (C3) sa Barangay Cabilang Baybay.
Ang nasabing lugar na itinalagang main COVID-19 vaccination site ay hinati sa anim na sections. Una ay ang waiting area; pangalawa: ang registration area pangatlo: ang pre-vaccination, counseling, and final consent area; pang-apat: screening area; panglima: vaccination area at ang pang-anim ay ang post-vaccination monitoring area.
Bukod sa Carmona Community Center, may satellite locations din na itinayo sa Brgys. Bancal at Lantic sa bayan ding ito.
Ang COVID-19 Data Management Unit ay nasa Katsumi Onda area ng Carmona Municipal Hall kung saan ang Municipal Information Technology Unit ang nagtalaga para na rin sa kaligtasan ng COVID-19 vaccine recipients’ information.
Samantala, ang Municipal Health Office naman ay natapos na ang preparasyon para sa cold storage facility ng COVID-19 vaccines.
Ang simulation activity ay pinangunahan ni Municipal Mayor Roy Loyola, Congresswoman Dahlia Loyola, Vice Mayor Cesar Ines Jr., at ang mga miyembro ng Sangguniang Bayan at ng Municipal Health Office na si Dr. Homer Aguinaldo.
- Latest