Binatilyo natusta sa sunog sa pagsagip sa alagang aso
TUGUEGARAO CITY, Cagayan, Philippines — Nasawi nang lamunin ng apoy ang isang 16-anyos na binatilyong nagtangkang sagipin ang alagang aso sa loob ng nasusunog nilang bahay sa Barangay Poblacion West, Sta. Maria, Pangasinan kamakalawa ng gabi.
Kinilala ni Fire Officer 2 Shiela Joyce Dotimas ng Sta. Maria BFP ang nasawi na si Angelo Jordan Sumabong.
Ayon kay Dotimas, natagpuan ang sunog na bangkay ng binatilyo sa gitna ng natupok na bahay.
Nabatid na nagsimula ang apoy dakong alas-11:20 ng gabi.
Ayon sa mga saksi, nakalabas na mula sa nasusunog na bahay ang biktima kasama ng kanyang ina na si Rose Mia Sumabong nang balikan nito ang naiwang alagang aso.
Mabilis kumalat ang apoy sa bahay na gawa lamang sa kahoy na dahilan upang ma-trap ang biktima na humantong ang pangyayari sa malagim niyang kamatayan.
Inaalam pa ng mga arson investigators ang halaga ng danyos at dahilan ng pagsiklab ng sunog.
- Latest
