6 ektaryang dumpsite sa Cavite, pinadlock ng DENR
MANILA, Philippines — Ipinasara ng Department of Environment and Natural Resources (DENR) ang anim na ektaryang open dumpsite sa Cavite dahil sa paglabag sa Republic Act 9003 o mas kilala sa tawag na Ecological Solid Waste Management Act of 2000.
Partikular na nilabag ng operator ng dumpsite ang Section 37 ng R.A 9003 mahigpit na nagbabawal ng pagkakaroon at pagmantine ng open dumpsite na malaki ang nagiging epekto sa kalikasan at kalusugan ng publiko.
Nabatid na kasama ng DENR sa operasyon ang National Bureau of Investigation at Environmental Management Bureau na nagsara sa entry points ng privately-owned open dumpsite na matatagpuan sa Brgy. Sahud-Ulan, Tanza, Cavite.
Kabilang sa mga tambak ng basura na nakita sa operasyon ay nagmula sa industrial parks, malls, supermarkets, food chains, restaurants at food product manufacturers. Kinumpiska rin ang dalawang dump trucks at isang backhoe na naabutan sa lugar na itinurn-over sa DENR-PENRO Cavite.
Ayon kay DENR Usec. for Solid Waste Management and Local Government Units Concerns Benny Antiporda na nanguna sa operasyon, iimbitahan ng DENR ang local government officials ng Tanza upang ipaliwanag ang pagkakaroon ng open dumpsite sa kanilang lugar.
- Latest
