3 dinukot na bading, natagpuang patay
CAVITE, Philippines — Tatlong miyembro ng LGBTQ (lesbian, gay, bisexual, transgender at queer) na dinukot ng armadong kalalakihan noong Disyembre 19, 2020 sa kanilang bahay sa Bacoor City ang natagpuan ng mga awtoridad na kapwa patay sa malalim na bangin sa Brgy. San Jose, Tagaytay City kahapon.
Sa ulat ng pulisya, kinilala ang mga biktima na sina Lino Quilaneta alyas “Nicole”, Mark Ian Endrina alyas “Erika” at Gleiar Bondoc alyas “RR”, isa umanong kagawad sa Brgy. Zapote Uno, pawang mga bading, nasa hustong gulang at residente ng Bacoor City.
Nagulat ang pulisya nang matagpuan din sa masukal na bangin ang isa pang bangkay na inaalam na ang pagkakakilanlan.
Sa imbestigasyon, dakong-10:00 ng umaga nang matagpuan ng pulisya ang mga naagnas nang bangkay ng mga nawawalang biktima sa malalim na bangin sa Brgy. San Jose, Tagaytay City.
Nabatid na unang natagpuan ang mga bangkay nina Quilaneta at Endrina saka sumunod ang kagawad at nakita rin sa lugar ang isa pang katawan.
Ang bangkay ng tatlong miyembro ng LGBT ay positibong kinilala ng kanilang mga kaanak.
Nanawagan naman ng hustisya ang kanilang pamilya dahil sa wala silang maisip na dahilan umano upang paslangin ang mga biktima.
- Latest