Mister utas, misis sugatan sa ambush
TALAVERA, Nueva Ecija, Philippines — Nasawi ang isang 59-anyos na mister habang sugatan ang kanyang misis nang abangan at pagbabarilin sila ng hindi pa nakikilalang salarin sa Barangay Pula, dito, noong Martes ng madaling-araw.
Kinilala ng pulisya ang nasawi na si Romeo Ramos, 59, at ang sugatang misis nito na si Editha, 58, kapwa ng Barangay Homestead 2, Talavera.
Sa ulat, bandang alas-4:30 ng madaling-araw habang sakay ng kanilang tricycle, may plakang 5577XU, ang mag-asawang patungong pamilihang bayan nang abangan umano ng suspek.
Habang tinatahak ng mag-asawa ang madilim na kalsada ng Brgy. Pula ay bigla umanong sumulpot sa kanilang likuran ang suspek na lulan ng hindi pa batid na sasakyan.
Bigla na lamang pinaulanan ng mga bala ang mag-asawa na agad na ikinasawi ng mister habang ang misis nito ay nagawa pang maitakbo ng mga sumaklolong residente sa Premeier General Hospital sa Cabanatuan City.
Nabatid na nasa stable nang kondisyon si Editha ngunit hindi pa umano nagbibigay ng salaysay ukol sa naganap na pamamaril sa kanilang mag-asawa.
Sinisiyasat pa ng pulisya ang motibo sa pananambang sa mag-asawa.
- Latest
