23 hog raisers na apektado ng ASF, inayudahan ng DA

MANILA, Philippines — Tumanggap ng indemnification cash assistance mula sa Department of Agriculture (DA) ang may 23 swine raisers ng La Union at Ilocos Sur na naapektuhan ang mga alagang baboy ng African Swine Fever (ASF).

Ayon kay Agriculture Sec. William Dar , may 15 ASF-affected raisers ng Bario-an, Tagudin, Ilocos Sur ang tumanggap ng kabuuang  P335,000 indemnification fund habang walong swine raisers mula sa La Union ang tumanggap ng kabuuang  P765,000.00.

Si Ms. Maurentina Pamintuan, isa sa naapekthang swine raiser ang tumanggap ng pinakamataas na indemnification na may halagang P90, 000 dahil sa kanyang 18 baboy na pinatay na infected ng ASF.

Sa tala ng DA-ASF-related cases sa Ilocos Region, mayroong 36,530 kabuuang baboy ang pinatay dahil sa ASF sa tatlong lalawigan na may 5,279 hog raisers ang naapektuhan.

Sa tatlong probinsya, nakakuha ang Pangasinan ng pinakamataas na share ng indemnity fund na nasa P98.805 milyon para sa 2,672 raisers mula sa 36 na bayang tinamaan ng ASF.

Sa La Union, may kabuuang 9,160 baboy ang pinatay sa isinagawang culling operations ng DA na may halagang P45.8 million kung saan 1,379 raisers ang naapektuhan mula sa 13 bayan at isang lunsod sa lalawigan.