Cabugao, Ilocos Sur isinailalim sa MECQ
TUGUEGARAO CITY, Cagayan, Philippines — Isinailalim sa modified enhanced community quarantine (MECQ) ni Ilocos Sur Governor Ryan Luis Singson ang bayan ng Cabugao matapos makapagtala ng biglang pagtaas ng kaso ng hawaan ng COVID-19 doon kahapon.
Ayon sa Provincial Health Office, nagtala sila ng 15 bagong kaso ng COVID 19 sa naturang bayan na mayroon nang kabuuang 25 na kaso.
Bukod sa mga kumpirmadong kaso, 103 suspected COVID cases pa ang sinusubaybayan ng awtoridad sa 25 na barangay.
Ang MECQ ay nagsimulang ipatupad noong Huwebes matapos lagdaan ni Singson ang Executive Order number 1.
Ang Cabugao ang ikalawang bayan sa Ilocos sur na isinailalim ni Singson sa MECQ mula nang ipinatupad ito sa Tagudin noong Disyembre.
Sa ilalim ng MECQ, pinahaba ang curfew sa nasabing bayan mula alas-8:00 ng gabi hanggang alas-5:00 ng umaga.
- Latest
