Maguindanao encounter: 7 terorista patay sa MILF
Pananabotahe sa pagsalubong ng 2021, nasilat
NORTH COTABATO, Philippines — Pitong miyembro ng Dawlah Islamiya (DI) terrorist group na tangkang manabotahe sa pagsalubong ng bagong taon ang patay matapos makipagbakbakan sa mga kasapi ng Moro Islamic Liberation Front (MILF) sa Brgy. Tuka, Mamasapano, lalawigan ng Maguindanao, kamakalawa.
Ang mga nasawing ekstremista ay kabilang sa 30 na armadong balak sanang umatake sa detachment ng 33rd Infantry Battalion sa nabanggit na barangay.
Patuloy namang inaalam ang pagkakakilanlan ng mga napaslang na terorista.
Sa ulat na nakarating kay Major Gen. Juvymax Uy, commander ng 6th Infantry Division ng Philippine Army at Joint Task Force Central, pinamunuan umano ni MILF Samad Simpal ang pagharang sa mga grupo ng Dawlah Islamiya sa hangganan ng Shariff Aguak at Shariff Saidona Mustapha dahilan ng engkuwentro sa dalawang pangkat na ikinasawi ng pitong DI terrorists.
Dahil dito, napigilan ang tangka sanang pananabotahe ng nasabing teroristang grupo at mga kapanalig na Bangsamoro Islamic Freedom Fighters (BIFF) nitong pagsalubong ng bagong taon.
Sinabi ni Heneral Uy na ang pitong nasawi ay mga tagasunod ni Kumander Motorola, sa ilalim ng grupo ni Iman Karialan, isa sa mga lider ng tatlong factions ng Dawlah Islamiya.
Si Karialan ay idinadawit sa mga pambobomba sa Central Mindanao sa mga nakalipas na apat na taon.
- Latest